Пра навучанне ў Калегіюме

Чаму мы вучым і чаму вучымся ў Беларускім Калегіюме?
Вучымся думаць. Крытычна і самастойна. Думаць у беларускім кантэксце, з беларускай перспектывы. Думаць Беларусь.
У аснове – работа на творчых семінарах (т’ютары – Валянцін Акудовіч, Ігар Бабкоў, Ірына Дубянецкая, Максім Жбанкоў), а таксама на лекцыях і майстар-класах вядомых інтэлектуалаў, навукоўцаў, журналістаў, творчых асобаў. (Гл. праграма БК 2020-21).

У фокусе – гуманітарныя і сацыяльныя навукі: філасофія і літаратурная крытыка, сацыяльная і інтэлектуальная гісторыя, даследаванні культуры, урбаністыка, работа ў медыя і візуальных фарматах ды інш.

Нашы курсы лекцый – трансдысцыплінарныя. Яны аб’ядноўваюць матэрыялы і падыходы розных кірункаў і арыентаваныя на праблематызацыю, пастаноўку пытанняў, работу з новым матэрыялам. Выкладчыкі – вядомыя даследчыкі, інтэлектуалы, творцы.

Нашыя навучэнцы – студэнты старэйшых курсаў ВНУ, магістранты і аспіранты, маладыя навукоўцы, людзі, якія ўсвядомілі недастатковасць фармальнай адукацыі і хацелі б вучыцца глыбей і далей – разам з сябрамі і калегамі.

Нашае навучанне –  індывідуальнае. Гэта значыць, што пасля паступлення ў Калегіюм і выбару творчых семінараў, вы разам з куратарамі складаеце сабе план работы, творачы з наяўных курсаў і майстар- класаў, работы ў семінарах і праектах індывідуалізаваную навучальную праграму.

Звычайна навучанне займае два гады. Але ў асобных выпадках індывідуальная праграма можа быць як карацейшая, так і даўжэйшая. 

Агулам, можна сказаць, што Беларускі калегіюм бачыць сябе як “нацыянальны ўніверсітэт 5.0”.  Як публічная пляцоўка, агора, – і ў той жа час праектная лабараторыя, дзе тчэцца беларуская будучыня. Што гэта значыць канкрэтна.

1. Месца дзе выкладаюць і дзе вучаць не дысцыплінам, а дыскурсам і тыпам мыслення. У нашых курсах мы імкнемся прадставіць ўсё самае важнае і новае ў беларускай гуманістыцы, філасофіі, сацыяльных навуках. Але не толькі. У эпоху “моокаў” і вікіпедыцыі мы робім стаўку на ўнікальнае, на тое, што не можа быць штучна вытварана і памножана: жывая прысутнасць побач з майстрамі і творцамі, супольная работа ў семінарах і творчых праектах.

2. Месца, дзе абмяркоўваюцца і ствараюцца сцэнары і варыянты беларускай будучыні. У сустрэчы, сутыкненні трох тыпаў творчай эліты: інтэлектуальнай, тэхналагічнай і эканамічнай. Вынікі гэтага абмеркавання мусяць быць адкрытымі, даступнымі, – у тым ліку і ў сучасных медыя-фарматах.

3. Месца, дзе апякуюцца беларускай традыцыяй. Шматмоўнай, поліэтнічнай, але незапярэчна тутэйшай. І сярод гэтай традыцыі найноўшы беларускі праект і ідэнтычнасьць – цэнтар і аб’яднаўчая сіла.